2016 жылдың 12-15 қазан аралығында Еуразия ғылыми-зерттеу институтының Думлупынар университетімен бірлесіп ұйымдастырған I Халықаралық афро-еуразиялық зерттеулер конгресі басталды.

2016 жылдың 12-15 қазан аралығында Еуразия ғылыми-зерттеу институты мен Думлупынар университеті бірлесіп I Халықаралық афро-еуразиялық зерттеулер конгресін ұйымдастыруда. Конгреске Қазақстан, Түркия, Әзірбайжан, Ресей т.б. 15 түрлі елден 150-ге жуық ғалым қатысуда. Конгрестің мақсаты ғалымдардың зерттеу жұмыстарымен, аймақ мәселелеріне қатысты жаңа тұжырымдары мен пікірлерімен және бұл мәселелерді шешу әдістері мен тәсілдерімен бөлісуі үшін жыл сайын өткізілетін бірыңғай орталыққа айналу болып табылады. Сондай-ақ Конгресс Афро-Еуразия қалаларының академиялық және зияткерлік орталардағы үрдістерін ашуға қызмет етеді. Конгресс жыл сайын Афро-Еуразия аймағының әр түрлі қалаларында өткізіледі деп жоспарланып отыр.

Афро-еуразиялық зерттеулер конгресі әлеуметтік ғылымдар саласында жүргізілетін зерттеулер туралы ақпараттандыру деңгейін арттыруға және түрлі мәдени үдерістерді салыстыруға септігін тигізеді. Осылайша, Афро-Еуразия қалаларынан келген әлеуметтанушылар өз ғылыми зерттеулері мен жұмыстарын ұсынып, әлеуметтану саласындағы зерттеулерге жалпы және аймақтық мағынада үлес қоса алатын болады.

2016 жыл ЮНЕСКО тарапынан «Қожа Ахмет Ясауи жылы» ретінде жарияланған болатын. Осы тұрғыда Конгрестің тағы бір мақсаты – Қожа Ахмет Ясауи мен оның шәкірттері жүріп өткен жол бойынша Афро-Еуразия аймағындағы қалаларда Конгресті ұйымдастыру. Осылайша, Конгресс жыл сайын Афро-Еуразия аймағының әр түрлі қалаларында өткізіледі деп жоспарланып отыр.

Биылғы Конгрестің тақырыбы «Афро-Еуразия елдерінде мемлекет, қоғам, ақпарат және ақпараттық технологиялар» деп аталады. Бұл тұрғыда, Афро-Еуразия елдерінде ақпараттық технологиялардың қоғам мен саясатқа ықпалы бағаланып, Афро-Еуразия аймағына қатысты түрлі мәселелер қарастырылатын болады.

Конгрестің бірінші күнінде ашылу рәсімі өтіп, Түркиядан келген суретшілердің көрмесі ұйымдастырылды. Ашылу рәсімінде Түркия Республикасының Алматы қаласындағы Бас консулы Рыза Каған Йылмаз, Қожа Ахмет Ясауи атындағы Халықаралық қазақ-түрік университетінің Өкілетті кеңес төрағасы профессор, доктор Мұса Йылдыз, Қожа Ахмет Ясауи атындағы Халықаралық қазақ-түрік университетінің Өкілетті кеңес мүшесі профессор, доктор Мухиттин Шимшек, Қожа Ахмет Ясауи атындағы Халықаралық қазақ-түрік университетінің ректоры профессор, доктор Уәлихан Әбдібеков, Шет тілдер және іскерлік мансап университетінің ректоры профессор, доктор Сабри Хизметли, Думлупынар университеті Әлеуметтік ғылымдар институтының директоры доцент, доктор Ниязи Курназ және Еуразия ғылыми-зерттеу институтының директоры доцент, доктор Невзат Шимшек сөз сөйледі.

Түркия Республикасының Алматы қаласындағы Бас консулы Рыза Каған Йылмаз өз сөзін Еуразия ғылыми-зерттеу институтына, Қожа Ахмет Ясауи атындағы Халықаралық қазақ-түрік университетіне және Думлупынар университетіне алғыс білдіруден бастады. Афро-Еуразия аймағының адамзат өркениеті, экономикасы және мәдениетінің ежелгі тарихи орталығы екенін мәлімдеді. Афро-Еуразия аймағының қақ жүрегінде орналасқан Түркияның 2023 және 2071 нысаналары мен іске асырылып жатқан жобалары туралы қысқаша ақпарат берді. Түркияның Африка елдеріне жәрдем бағдарламаларына тоқталып өтіп, Түркияның Еуразия мен Африкада адамдардың лайықты өмір сүруі мен әркімнің пайдасына бағытталған саясатты жүзеге асырғаны туралы баяндады. 15 шілдедегі төңкеріс әрекетінің Түркияны бұл мақсатынан айыра алмайтынын қосып айтты. Адамзаттың дамуы мәселесіне назар аударып, бұл саясаттардың жаратылғандарды жаратушыдан артық жақсы көру философиясына негізделгенін ерекше атап өтті. Сөз соңында қатысушыларға сәттілік тіледі.

Қожа Ахмет Ясауи атындағы Халықаралық қазақ-түрік университетінің Өкілетті кеңес төрағасы профессор, доктор Мұса Йылдыз өз сөзінде Еуразия ғылыми-зерттеу институты және Конгреске қолдау көрсеткен ұйымдарға алғысын білдіруден бастады. Қожа Ахмет Ясауидің қайтыс болуының 850 жылдығында Қожа Ахмет Ясауи университетінің ЮНЕСКО деңгейінде атқарған іс-шаралары мен 2016 жылды «Қожа Ахмет Ясауи жылы» деп жариялағандары туралы айтты. Осы жылы Қазақстан, Түркия және түркі әлемінің түрлі елдерінде 25 атаумен 250 іс-шараның ұйымдастырылып жатқанын және Конгрестің осы іс-шаралар аясында жасалғанын айқындады. Еуразия ғылыми-зерттеу институтымен Еуразия аймағы бойынша табысты жұмыстардың атқарылғанын, Думлупынар университетімен Африкаға ықпал ету саласын анағұрлым кеңейту маңыздылығын атап өтіп, қатысушыларға сәттілік тіледі және Конгрестің нәтижелі болуын тіледі.

Қожа Ахмет Ясауи атындағы Халықаралық қазақ-түрік университетінің Өкілетті кеңес мүшесі профессор, доктор Мухиттин Шимшек өз сөзін Конгресті ұйымдастырып, оған қолдау көрсеткен ұйымдарға алғысын білдіруден бастады. Түркияда 9 млн. студент, 350 мың магистрант және 78 мың докторанттың болғанына назар аударып, Түркияның өте құнды табиғи ресурстарының бар екенін атап өтті. Жерасты ресурстарын жұмыс күшімен өңдеп, қосымша құны жоғары өнімдерге айналдырудың маңызды екеніне тоқтала кете, Конгресс тақырыптарының жақсы таңдалып, маңызды мәселелерді қозғағанын қоса айтты. Сөзінің жалғасында қазіргі таңда білімге қол жеткізудің қиын еместігін, білім мен технологияны мақсатқа сай пайдаланудың маңызды екенін тілге тиек етті.

Қожа Ахмет Ясауи атындағы Халықаралық қазақ-түрік университетінің ректоры профессор, доктор Уәлихан Әбдібеков те өз сөзін Конгресті ұйымдастыруға үлесін қосқан барлық ұйымдарға алғыс айтудан бастады. Конгрестің ғалымдардың Афро-Еуразия елдеріне қатысты экономикалық, әлеуметтік және саяси мәселелер бойынша жаңа идеялар мен түрлі тақырыптарды талқылауға мүмкіндік беретін маңызды тұғырнамаға айналуын тіледі. Конгреске қатысқан ғалымдарға сәттілік тілеп, аталған тақырыптар бойынша пайдалы идеялардың туындауын тіледі.

Шет тілдер және іскерлік мансап университетінің ректоры профессор, доктор Сабри Хизметли өз сөзінде түркі халықтарының Жібек жолы бойынша ғалымдар мен ақын-жазушылар арқылы Шығыстан Батысқа өркениет әкелгенін айқындады. Мұндай ғылыми және мәдени іс-шаралар арқылы дәл сондай қызмет пен миссияның іске асырылғанын атап өтіп, Конгресті ұйымдастырған ұйымдарға алғысын білдірді.

Думлупынар университеті Әлеуметтік ғылымдар институтының директоры доцент, доктор Ниязи Курназ өз сөзін Конгрестің өткізілуіне мүмкіндік жасаған Думлупынар университетінің ректоры профессор, доктор Ремзи Гөренге және қолдау жасаған ұйымдарға алғыс айта отырып бастады. Афро-Еуразия елдері арасындағы экономикалық қарым-қатынастардың дамығанын, бірақ академиялық саладағы ынтымақтастықтың әлі дамымағанын мәлімдеді. Халықаралық афро-еуразиялық зерттеулер конгресі осы кемшілікті жоюға үлес қосу мақсатында ұйымдастырылып жатқанын айтты. Конгресте зияткерлік ақпарат пен тәжірибемен алмасу және академиялық зерттеулер туралы ақпараттандыру деңгейін арттыру арқылы Афро-Еуразия аймағы бойынша әлеуметтік зерттеулерге жалпы және аймақтық мағынада үлес қосу мақсатының көзделгенін айқындады.

Еуразия ғылыми-зерттеу институтының директоры доцент, доктор Невзат Шимшек өз сөзінде биыл Қожа Ахмет Ясауидің қайтыс болуының 850 жылдығына орай көптеген іс-шаралар ұйымдастырғандарын мәлімдеп, жасаған іс-шаралар туралы ақпарат берді. Олардың біріне кең ауқымды I Халықаралық афро-еуразиялық зерттеулер конгресінің жататынын айтты. Афро-Еуразия ұғымының Түркияның Африка және Еуразия мақсатын көрсету тұрғысынан маңызды екенін мәлімдеген Шимшек озық экономикасы арқылы Түркияның Африка және Еуразия аймақтарының өндірістік және технологиялық орталығы болуға үміткер болып табылатынын айтты. Сонымен қатар, конгресс арқылы Африканың нарығын әртараптандыру тұрғысынан Еуразия елдеріне сансыз мүмкіндіктер ұсынғанына назар аудара отырып, халқымен, табиғи ресурстарымен және даму әлеуетімен Африканың алдағы онжылдықтарда көп уақыт бойы күн тәртібінде қалатынын айтты.

Конгресс екінші, үшінші және төртінші күндері өткізілетін 28 отырыспен жалғасып, 2016 жылдың 14 қазанында аяқталады.