Түркия Республикасы Алматы Бас консулдығының қолдауымен Еуразия ғылыми-зерттеу институты Шет тілдер және іскерлік карьера университеті және әл-Фараби атындағы Қазақ ұлттық университеті Шығыстану факультетінің ТҮРІКСОЙ кафедрасымен бірлесе отырып Түркияның ұлттық әнұранының қабылдануы мен Мехмет Акиф Эрсойды еске алу шарасын өткізді. Жиынның мақсаты Түркияның ұлттық әнұранының Түркияның Ұлы Ұлттық Мәжілісінде қабылдануының 96 жылдығын атап өту және ұлттық әнұран авторы Мехмет Акиф Эрсойдың шығармалары, өмірі мен қиын кезеңде шығарған өлеңдері, уағыздары және ұлтына рухани көшбасшылық мәселелері туралы ақпарат беру болып табылады. Жиын бір минуттық үнсіздіктен басталып, кейін Түркия мен Қазақстанның мемлекеттік әнұрандары шырқалды.
Жиында Түркия Республикасының Алматы қаласындағы Бас консулы Рыза Қаған Йылмаз, Шет тілдер және іскерлік карьера университеті ректорының орынбасары доцент, доктор Ержан Қуанышбаев, әл-Фараби атындағы Қазақ ұлттық университеті Шығыстану факультеті ТҮРІКСОЙ кафедрасының меңгерушісі доцент, доктор Төрәлі Қыдыр, Қожа Ахмет Ясауи атындағы Халықаралық қазақ-түрік университеті Еуразия ғылыми-зерттеу институтының директоры э.ғ.д., доцент Невзат Шимшек сөз сөйледі.
Түркия Республикасының Алматы қаласындағы Бас консулы Рыза Қаған Йылмаз өз сөзін түрлі ұйымдардан келген өкілдерге жиынға қатысқандары үшін алғыс білдіруден бастады. Рыза Қаған Йылмаз ұлттық әнұран жазылған кезеңге тоқталып өтіп, бір-біріне ұласқан соғыстардан титықтаған халықтың тәуелсіздік үшін күрес кезеңінде Мехмет Акиф Эрсойдың ұлттық әнұранды сол күндердің рухын сезіне отырып жазғанын айтты. Түрік халқының мыңдаған жылдық мемлекеттілік тәжірибесінің болғанын және әнұранның түрік халқының басын тік ұстап, тәуелсіздікке адалдығын көрсететін ұлттық келісім мәтіні екенін айқындады. Сөз барысында Түркияның ұлттық әнұранынан үзінділер оқып, әнұранда Мехмет Акиф Эрсойдың отан сүйгіштігі мен түрік халқының мінезін, сондай-ақ отанға, мемлекетке және тәуелсіздікке махаббатын байқауға болатынын атап өтті. Бұған қоса, әнұранды жазу үдерісі мен Мехмет Акиф Эрсойдың өмірі туралы ақпарат беріп өтті. Мехмет Акиф Эрсойдың халқына ақыл айту мақсатында Анадолыны кезіп, сөз сөйлегенін тілге тиек етті.
2016 жылғы 15 шілде күні ФЕТӨ лаңкестік ұйымы тарапынан жасалған шабуылға түрік халқының Чанаккале рухымен қарсы тұрғанын және бұл шабуыл кезінде 249 адамның қаза тауып, 2193 адамның Гази атағын иеленгенін мәлімдеді. Соңғы кезде Нидерландыда болған оқиғаларға тоқталып өтіп, Еуропадағы түрік азаматтарының жалғыз емес екенін, Еуропада адам құқықтарын шын мәнінде қорғайтындардың мұндай оқиғаларға жол бермейтіндігін айтты. Рыза Қаған Йылмаз мырза Түркияның Ұлы Ұлттық Мәжілісінде әнұранды қабылдағандарға, Мұстафа Кемал Ататүрікке, Мехмет Акиф Эрсойға және шейіттер мен газилерге құрмет білдірді. Мехмет Акиф Эрсойдың «Алла бұл халыққа тағы ұлттық әнұран жазғысбасын» деген сөзін келтіріп, өз сөзін аяқтады.
Шет тілдер және іскерлік карьера университеті ректорының орынбасары доцент, доктор Ержан Қуанышбаев Ұлттық әнұран Түркия Республикасы мен түрік халқының тек бүгінін ғана емес, өткені мен болашағын да қамтыған туынды екенін айтты. Мехмет Акиф Эрсойдың ақын, жазушы және ойшыл болғанын, Осман империясының 600 жылдық тарихының ең қиын кезеңдерінің бірінде өз халқына бағыт беруге, рухын тәрбиелеуге, ақыл айтуға тырысқанын айтты. Шығармаларында исламизм мен түрік халқының бірлігі орын алғанын және халқына ақыл айту мақсатында Анадолыға барып, халықпен сөйлескенін айтты. Түркия халқының ұлт-азаттық күресі кезінде түркі әлемінің көбісі Кеңес Одағы құрамында болғанына қарамастан, түркі бауырларына қиын-қыстау кезеңде жәрдемдесу мақсатында ақындардың шығармалар жазғанын және Мағжан Жұмабаевтың «Алыстағы бауырыма» атты өлеңін бұған мысал ретінде келтіруге болатынын тілге тиек етті.
әл-Фараби атындағы Қазақ ұлттық университеті Шығыстану факультеті ТҮРІКСОЙ кафедрасының меңгерушісі доцент, доктор Төрәлі Қыдыр өз сөзін әнұрандар әр елдің рухын бейнелейді деп айтудан бастады. Түркі әлемінде өлең жазу ежелден бері келе жатқанын және бұл өлеңдер әнұранға айналу үшін оған рух қажет деп атап өтті. Түркияның ұлттық әнұранынан үзінділер оқып, мағынасы бойынша өз пікірлерін білдірді. Қазақстанда әнұранның екі рет өзгертілгенін, алғаш рет Қазақстан тәуелсіздік алғаннан кейін өзгертілгенін, ал екінші рет 2006 жылы әнұран әуені ауыр болғандықтан қазіргісіне ауыстырылғанын айтты.
Еуразия ғылыми-зерттеу институтының директоры э.ғ.д., доцент Невзат Шимшек өз сөзін жиынды өткізуге үлес қосқан серіктестерге алғыс айтудан бастады. Мехмет Акиф Эрсойдың шығармаларын оқырман ретінде қарастырғанда оның өз халқына адалдығын көруге болатынын айтты. Әнұранды ұлттың азаттық күресі мен азаптарын жүрегімен сезе отырып жазғанын тілге тиек етті. Мехмет Акиф Эрсойдың әнұранды жазуы кездейсоқ нәрсе емес екенін, оның жеке өзінен талап етілгенін атап өтті. Ақынның әнұранды «Сафахат» атты өлеңдер жинағына енгізбей, оны өзінікі емес, халыққа тиесілі деп айтқанын мәлімдеді. Мехмет Акиф Эрсойдың иманы берік зиялы адам болғанын және әр нәрсеге зияткерлік жауапкершілікпен қарап, өз болмысын сақтап қалуға тырысуы арқылы ізгілік пен адамгершіліктің үлгісі болғанын айтып, өз сөзін аяқтады.
Еске алу шарасы «Қажымас халық» деген қысқа фильмнің көрсетілімімен аяқталды.