Қазақ хандығының 550 жылдығына арналған «қазақ хандығы және қазақстан: идеялар мен ғасырлар жалғастығы» халықаралық жиыны
Халықаралық Түркі Академиясы (ІТА) және Қ.А. Ясауи атындағы Халықаралық Қазақ-Түрік Университеті жанындағы Еуразия ғылыми-зерттеу институтының бірлесіп ұйымдастыруымен 27 ақпан 2015 жылы «Қазақ Хандығы және Қазақстан: идеялар мен ғасырлар жалғастығы» атты халықаралық конференция өткізді.
Халықаралық Түркі Академиясы (ІТА) және Қ.А. Ясауи атындағы Халықаралық Қазақ-Түрік Университеті жанындағы Еуразия ғылыми-зерттеу институтының бірлесіп ұйымдастыруымен 27 ақпан 2015 жылы «Қазақ Хандығы және Қазақстан: идеялар мен ғасырлар жалғастығы» атты халықаралық конференция өткізді.
Елбасының бастамасымен биыл Қазақ Хандығының 550 жылдығы кең көлемде аталып өтіп жатқаны белгілі. Осыған орай ұйымдастырылған халықаралық деңгейдегі жиынға Қазақстан, Түркия, Өзбекстан және Қырғызстан тарихшылары, ғылыми-зерттеу институттардың басшылары, түркітанушы ғалымдар, ЖОО ректорлары мен бұқаралық ақпарат құралдар өкілдері қатысты. Халықаралық жиын аясында ҚР ҰҒА Академигі, көрнекті түркітанушы-ғалым Рәбиға Сыздықованың Халықаралық Түркі Академиясы тарапынан басылып шығарылған «Жәмиғ’ат-Тауарих» кітабының таныстырылымы өтіп, тоқсаннан асса да ғылымнан қол үзбеген ғалымға Иштван Мандоки атындағы медаль табыс етілді. Өз кезегінде Рәбиға Сәтімғалиқызы жеке кітап қорын Халықаралық Түркі Академиясы кітапханасына түгелдей тапсыратынын айтты.
Сонымен қатар, Қ.А.Ясауи атындағы Халықаралық Қазақ-Түрік университеті Өкілетті кеңесінің төрағасы Осман Хоратаның Қазақстандағы қызмет мерзімінің аяқталуына байланысты сый-сияпат көрсетіліп, Түркі Академиясының арнайы Алғыс хатымен марапатталды.
Халықаралық жиынның мақсаты – Қазақ Хандығының 550-жылдығын Қазақстан, Түркия, Өзбекстан және Қырғызстан тарихшыларының қатысуымен халықаралық ғылыми деңгейде атап өтіп, Қазақ Хандығы және Түркі тарихының келелі мәселелерін талқылау, сондай-ақ, келешек ғылыми жобаларға қатысты ортақ жоспарлар жасауды талқылау болды. Сондай-ақ, басқосуда қазіргі Қазақстанның мемлекет ретінде қалыптасуындағы Қазақ Хандығының тарихи рөліне назар аударылды.
Халықаралық Түркі Академиясының президенті, тарих ғылымдарының докторы Дархан Қыдырәлі Қазақ Хандығының жалпы Түркі тарихындағы орны мен маңызын баса айтып, аталған мерейлі межені бауырлас түркі елдерінде және халықаралық деңгейде насихаттау қажеттілігіне тоқталды.
Түстен кейін Түркі Академиясы мен Қазақстан Республикасының Ұлттық кітапханасы бірлесіп «Мәдени мұра» мемлекеттік бағдарламасы қорытындыларының халықаралық таныстырылымын өткізді.
Конференцияның ұйымдастырушысы Еуразия ғылыми-зерттеу институтының директоры доцент Невзат Шимшек конференцияның Қазақ Хандығының тарихи маңыздылығын және ортақ Түркі тарихы ішіндегі рөлін көрсету үшін ұйымдастырғанын білдірді.