Доктор Ажар Серікқалиева «Қытайдың жаңғырту парадигмасы» атты семинарында жалпы Қытайдың жаңғырту үдерісінің тарихына және оның маңызды кезеңдеріне тоқтала кетіп, тақырып бойынша егжей-тегжейлі ақпарат ұсынды. Қытайдың жаңғыру үдерісін бастауына XX ғасырда халық санының көбеюі, жер жетіспеушілігі және Тайпин көтерілісі сияқты ішкі тұрақсыздықтар әсер етті. Қытайдың жаңғырту үдерісінің үш негізгі кезеңі туралы баяндады. Олар: 1860-1940 жж. бастапқы кезең, 1940-1978 жж. революциялық кезең және 1978 жылдан бері жалғасып келе жатқан реформашыл кезең. Қытай тарихында маңызды бетбұрыс болған 1911 жылғы Синьхай көтерілісінің кейінгі жылдары азаматтық соғысқа айналғанын және Мао Цзедунның жеңіске жетуімен бірге жаңғырту үдерісінің тоқтағанын айтты.
Семинар жалғасында Қытайдың қатал коммунистік ережелермен басқарыла бастағанын және Қытай мәдениеті мен дініндегі кейбір элементтердің социализм идеологиясына сәйкес келмеуі салдарынан мәдени революцияның жүзеге асырылғаны жөнінде айтып берді. Мао Цзэдуннан кейін Дэн Сяопин кезеңінің басталғанын және оның билікке келуімен Қытайдың қатал социализмнен өзіне тән ерекшеліктеріне сай социализмге бет бұрғаны туралы мәлімдеді. Бұл кезеңде Қытай экономикасының ырықтандырылып, елде түрлі еркін сауда аймақтарының құрылғанын, шетелдік технологиялардың көбiрек пайдаланылғанын және осылайша Қытайдың әлемге ашыла бастағанын баяндады. Дэн Сяопиннің бір ел, екі жүйе үлгісі бойынша Макао және Гонконгтың Қытаймен бірігуін қамтамасыз етуі оның саяси саладағы ең үлкен жетістігі деп атап өтті.
Бұл реформалық кезеңнің Қытайдың жаңғыруында және экономикалық дамуында маңызды рөл атқарғанын айта келе, Қытайдың 1970-2010 жылдары қосылған құны жоғары өнімдердің экспортында 1990 жылдан кейін жеткен жетістіктің негізін қалыптастырғанын баяндады. Бұл реформалар ауыл шаруашылығында да іске асырылды. Дамыған экономиканың арқасында Қытайда кедейшілік пен аштықтан қиындық көріп өмір сүріп жатқандардың саны 1981 жылғы 800 миллионнан 2013 жылы 82 миллионға дейін азайды. Қытайдың бұл даму үдерісінің жалғасуы үшін экономиканың өсу қарқыны 7%-дан төмен түспеу керек.
Қытайдағы жаңғырту үдерісін аймақтық ауқымда қарастыра келе доктор Ажар Серікқалиева Пекин және Шанхай сияқты үлкен қалаларда социализм үдерісінің аяқталғанын және бұл қалаларда либералдық ақ социализмнің орнағанын айтты. Бірақ Қытайдың шығыс аймақтарында социализм үдерісі әлі аяқталмағандықтан, бұл аймақтағы қалалар әлі қызыл социализмнің ықпалында қалуда. Семинар соңында Қытай үкіметінің болашақ жаңғырту жоспарлары туралы ақпарат берді.
Семинар соңында қатысушылар Қытайдың жаңғырту үдерісі және Қытай экономикасының болашағы туралы пікір алмасты.