24 қараша 2015 жылы Еуразия ғылыми-зерттеу институты директоры доцент, доктор Невзат Шимшек Қазақстан Республикасы Білім және ғылым министрлігі Философия, саясаттану және дінтану институты директорының кеңесшісі профессор Әбдімәлік Нысанбаевпен кездесті. Екі жақты кездесуде доцент, доктор Невзат Шимшек, өзі басқарып отырған институтттың Ахмет Ясауи университетінің миссиясы мен міндетіне сай қызмет ететінін, осы мақсатта Түркия мен Қазақстан арасындағы қарым-қатынастың дамуына өзіндік үлес қосып және түркітілдес мемлекеттер мен қауымдастықтарға қатысты ғылыми зерттеу жұмыстарын жүргізетінін және осы саладағы түрлі жобаларға қолдау көрсетіп келе жатқанын тілге тиек етті. Сондай-ақ, доцент, доктор Невзат Шимшек Қазақстан тәуелсіздігінің қазақ халқы үшін маңыздылығына тоқтала отырып, алдағы айда Қазақстан тәуелсіздігінің 24 жылдығына арналған конференция өткізу жоспарда бар екенін айтып, профессор доктор Әбдімәлік Нысанбаевты баяндамашы ретінде қатысуға шақырды. Профессор доктор Әбдімәлік Нысанбаев өзінің жобалары жайында мағлұмат бере отырып, тәуелсіздіктің қазақ халқы үшін негізгі құндылықтарды қалыптастырғанын атап өтті және жоспарланған конференцияда «Тәуелсіздік – басты құндылық» атты баяндама жасайтынын білдірді.