Конференцияға Еуразия ғылыми-зерттеу институтының директоры доцент, доктор Невзат Шимшек, Эрзинджан университетінен доцент, доктор Хайдар Эфе, әл-Фараби атындағы Қазақ ұлттық университетінен профессор, доктор Ислам Жеменей қатысты. Конференцияда С.Д.Асфендияров атындағы Қазақ Ұлттық Медицина университетінің доценті Бисембаева Зинагүл Ұбайдуллақызы модератор болды.
Доцент, доктор Хайдар Эфе Түркия мен Қазақстан арасында тарихи байланыстардың болғанын айтып, Қазақстанның геосаяси құрылымы, Ресей және Қытай сияқты жаһандық акторлармен қарым-қатынастары туралы ақпарат берді. Қазақстанның мұнай секторында Еуропаның Ресейге тәуелділігін бұзатын балама болу әлеуетінің бар екенін атап өтті. Алайда, Еуропалық Одақтың Қазақстанмен қарым-қатынастарын дамыту бағытында Орталық Азия стратегиясы және Серіктестік пен ынтымақтастық туралы келісім сияқты екі жобаның болғанын айтты. әл-Фараби атындағы Қазақ ұлттық университетінен профессор, доктор Ислам Жеменей «Қожа Ахмет Ясауи – түркі әлемінің ортақ бабасы» атты баяндама жасады. Баяндамасында исламның таралуында Ахмет Ясауидың қомақты үлесі туралы сөз өрбітті. Ахмет Ясауидың шығармаларының негізгі идеясы ахлақ, төзімділік сияқты құндылықтардың дамуы екенін айтып, бүгінде адамдар осы рухани құндылықтарды жоғалта бастады деп өз пікірін білдірді.
Еуразия ғылыми-зерттеу институтының директоры доцент, доктор Невзат Шимшек өз сөзін Қожа Ахмет Ясауидың қайтыс болуының 850 жылдығы мен Орталық Азия Республикалары тәуелсіздігінің 25 жылдығына байланысты биылғы жылдың өте маңызды жыл екеніне назар аудара отырып бастады. Өз сөзінде Қожа Ахмет Ясауи университетінің ұсынысы бойынша және Қазақстан Республикасының қолдауымен 2016 жылдың ЮНЕСКО тарапынан «Қожа Ахмет Ясауи жылы» болып жарияланғанын және осы жылы Қожа Ахмет Ясауи университетінің 300-ге жуық іс-шара жүзеге асырғанын мәлімдеді. Түркияның Қазақстанның тәуелсіздігін алғаш мойындаған мемлекет болғанын айтып, 1992 жылдан бастап екі бауырлас ел арасындағы сауда байланыстары туралы ақпарат берді. Баяндама барысында Түркия мен Қазақстан арасындағы сауда қатынастары 1992 жылғы 30 млн. доллардан 2000 жылы 462 млн. долларға дейін артты деп атап өтті. Бұл көрсеткіш 2010 жылы 3 млрд. доллардан сәл асып, 2015 жылы бұл көрсеткіш шамамен 1 млрд. 850 млн. долларды құрады деп қоса айтты. Сонымен қатар, екі елдің экономикалық қарым-қатынастары аясында Түркияның Қазақстанға тікелей инвестициялары туралы мағлұмат берді және Қазақстанның қайтадан тәуелсіздігінің 25 жылдығымен құттықтап, өз сөзін аяқтады.
Конференция соңында С.Д.Асфендияров атындағы Ұлттық медицина университетінің студенттері Қожа Ахмет Ясауидың кейбір хикметтерін оқыды.