Қожа Ахмет Ясауи атындағы Халықаралық қазақ-түрік университетінің Еуразия ғылыми-зерттеу институтының делегациясы 2022 жылы 14-16 қазан аралығында Астанадағы бағдарламасы аясында Халықаралық Түркі академиясында болды.

Еуразия ғылыми-зерттеу институтының директоры, доктор Суат Бейлур мен институт директорының орынбасары Женгизхан Жаналтай, аға ғылыми қызметкерлер Өмірбек Қанай мен Алмас Жүнісбаев қатарлы делегация мүшелері Халықаралық Түркі академиясының вице-президенті, доктор Физули Мажидли Түркі академиясының тұрақты хатшысы Асхат Кесікбаев, Ғылым және талдау бөлімінің сарапшылары Тимур Козырев, Нурдин Усеев және Дінмұхаммед Әметбекпен кездесті.

Академияның вице-президенті Мажидли академияның мақсаттары мен қызметі, сондай-ақ, белгілі ғылыми орталықтармен бірлесіп ұйымдастырылған жұмыстары туралы толық ақпарат берді. Институт директоры доктор Суат Бейлур, Қожа Ахмет Ясауи атындағы Халықаралық қазақ-түрік университеті Еуразия ғылыми-зерттеу институтының зерттеулері мен жобалары туралы мәлімет беріп, Халықаралық Түркі академиясының түркі мемлекеттері арасындағы ынтымақтастықтағы маңызды институттардың бірі екенін тілге тиек етті. Кездесу барысында тараптар ынтымақтастық мүмкіндіктерін де талқылады.