Конференцияның ашылуында сөз сөйлеген Еуразия ғылыми-зерттеу институтының директоры доцент, доктор Вакур Сүмер Қазақстанның латын әліпбиіне өту үдерісі кезінде маңызды жұмыс атқарып жатқан А.Байтұрсынұлы атындағы Тіл білімі институтының қызметіне табыс тіледі. Қазақстан мәдениеті мен әдебиетін дамытуға үлес қосқан тарихи тұлғаларды еске алуға арналған конференциялар мен семинарлар өткізуге Еуразия ғылыми-зерттеу институты әрқашан дайын екендігін айтты. Бұған дейін де Алаш қайраткерлеріне қатысты көптеген ғылыми іс-шаралар өткізгендігін және бірлескен жобаларды іске асыруға әрдайым қолдау білдіретінін тілге тиек етті.
А.Байтұрсынұлы атындағы Тіл білімі институтының директоры ф.ғ.д., профессор Ерден Қажыбек баяндамасында халықаралық ғылыми-теориялық конференция «Ұлы даланың жеті қыры», «Болашаққа бағдар: рухани жаңғыру» атты бағдарламалық мақалаларды жүзеге асыруға бағытталған іс-шараны өткізуге қолдау білдірген Еуразия ғылыми-зерттеу институты басшылығына алғыс білдірді. ХХ ғасырдағы солақай саясаттың кесірінен қазақтың зиялы қауым өкілдері кінәсіз сотталғанын айтты. Қажыбектің пайымдауынша, зиялы қауым өкілдері Алаш қозғалысымен ұйықтап жатқан елімізді оятуға тырысып, солақай саясатқа қарсы шыққысы келді. Қажыбек архив қорларында жатқан арыстардың еңбектері тарихымызды түгендеуге, рухани болмысымызды бүтіндеуге негіз болатынын мәлімдеді.
Конференцияға Телжан Шонанұлының туған жері Ақтөбе облысынан арнайы қонақтар да келіп, болашақта Телжан Шонанұлының көп томдық шығармалар жинағын шығаруды жоспарлап отырғандарын жеткізді. Сонымен қатар, конференцияға Халықаралық «Қазақ тілі» қоғамының президенті, ф.ғ.д., профессор, ҚР ҰҒА академигі Өмірзақ Айтбайұлы, М.Әуезов атындағы Әдебиет және өнер институтының бас ғылыми қызметкері ф.ғ.д., профессор Айгүл Ісімақова, ҚР ҰҒА корр. мүшесі, п.ғ.д., профессор Фаузия Оразбаева, әл-Фараби атындағы Қазақ ұлттық университетінің профессоры, ф.ғ.д. Анар Салқынбай, әл-Фараби атындағы Қазақ ұлттық университетінің доценті ф.ғ.к. Аманқос Мектептегі сынды ғалымдар қатысып, Телжан Шонанұлының өмірі мен қайраткерлік қызметі туралы баяндама жасады.
Конференция соңында Еуразия ғылыми-зерттеу институты мен А.Байтұрсынұлы атындағы Тіл білімі институты тарапынан конференцияға қатысқан ғалымдар мен қонақтарға естелік сыйлықтар табыс етілді.