Доктор Кенжебек Ғабдуллин семинар барысында жалпы Үндістанның энергетикалық қауіпсіздігі, ұзақ мерзімді энергетикалық саясаты, Орталық Азия, Африка және Латын Америка елдеріндегі жобалары туралы, сондай-ақ энергетика саласында қызмет атқаратын үнді компаниялары туралы ақпаратты ұсынды. Үндістанда көмірді пайдалану қарқыны төмендеп, мұнай, табиғи газ және атом энергиясын пайдалану деңгейі өсті деп мәлімдеді. Үндістанның ұзақ мерзімді жоспарларын ескере отырып, «Vision 2020», «Vision 2025» және «Интеграцияланған энергетикалық саясат» атты үш негізгі стратегиясын атап өтті.
«Интеграцияланған энергетикалық саясат» және «Vision 2020» стратегияларының көмір және мұнай-газ салаларын ырықтандыруға, елдің энергетикалық инфрақұрылымына тікелей инвестицияларды көбірек жасауға, сондай-ақ жаңа технологияларды қолдануға бағытталғаны туралы баяндады. Сонымен қатар энергия тиімділігін арттыру мақсатында әсіресе газ тұтынуда инновациялық жоспарларды іске асыруға бағытталғанын ерекше атап өтті. Үндістанның сыртқы энергетикалық саясатының мұнай-газ импортын қамтамасыз етуді әртараптандыру арқылы түрлі аймақтардан энергия жеткізуді қамтамасыз етуге және бұл аймақтарда жаңа көздерді іздеуге бағытталғаны туралы мәлімдеді.
Семинар жалғасында доктор Кенжебек Ғабдуллин Үндістанның аймақтық энергетикалық саясаты туралы айта келе, «Аймақтың кеңейтілуі», «Шығысқа бағытталған саясат» және «Орталық Азиямен байланыс» жоспарлары туралы мағлұмат берді. Үндістан мұндай саясат жүргізу арқылы көршілес елдермен, Шығыс және Орталық Азия елдерімен түрлі салалардағы, әсіресе энергетикалық сектордағы қарым-қатынастарды нығайту мақсатын көздейді деп атап өтті. Сондай-ақ, Үндістан үшін Африка және Таяу Шығыс аймақтарының маңыздылығын талдап шықты.
Үндістанның Африка елдеріне мұнай, табиғи газ және электр энергиясы инфрақұрылымына айтарлықтай дәрежеде инвестициялар жасағанын және Судан, Ливия, Оңтүстік Африка сияқты елдердің Үндістанның ірі әріптестері болып келетінін айтты. Орталық Азия аймағына тоқтала кете, Үндістанның Қырғызстандағы ГЭС құрылысына жәрдемдескенін атап өтті. Бұл елдердің энергетикалық секторларының инфрақұрылымына инвестиция жасау арқылы болашақта энергетикалық қауіпсіздігіне үлес қосуды мақсат тұтатыны туралы баяндады. Үндістанның Орталық Азияға 2014 жылға дейін қарқынды қызығушылық танытқандығы, бірақ мұнай бағасының төмендеуіне байланысты қызығушылықтың азайғандығы туралы айтты. Эмбарголарды алып тастауға байланысты Иранмен энергетикалық сектордағы екіжақты қарым-қатынастардың арта бастағандығы туралы мәлімдеді. Газ құбырлары мәселесінде ТАПИ газ құбырына жеке тоқталып өтті. Кейбір сарапшылардың айтуынша, бұл жоба жүзеге асырылатын болса Үндістан мен Пәкістан арасындағы бейбітшілік жобасына айналып, екі мемлекет қарым-қатынастарына оң үлесін тигізуі мүмкін.
Семинар соңында қатысушылар Үндістанның энергетикалық қауіпсіздігі, өндіру және тұтыну қуаттары бойынша пікір алмасты.