2017 жылы 16 наурызда Еуразия ғылыми-зерттеу институтының аға ғылыми қызметкері т.ғ.д. Еркін Байдаров «Орталық Азия мемлекеттері: Бірыңғай Мәдениет және өркениет ерекшеліктері» тақырыбында семинар өткізді.

«Орталық Азия мемлекеттері: Бірыңғай Мәдениет және өркениет ерекшеліктері» тақырыбындағы семинарында т.ғ.д. Еркін Байдаров Орталық Азия елдерін біріктіретін тарихи және мәдени байланыстарды және ортақ өркениет қалыптастыруға мүмкіндік беретін факторлар туралы көзқарастарымен бөлісті. Орталық Азияда белгілі бір кезеңдерде өмір сүрген түрлі халықтардың аймақтағы өзіндік өркениеттің қалыптасуына өз үлестерін қосқанын атап көрсетті. Басқа өңірлермен салыстырғанда Орталық Азияның жаңа бір аймақ екенін және әлі де қалыптасу үстінде екенін білдірді. Аймақ елдерінің өзара бірлігін қамтамасыз ету үшін мәдени және әлеуметтік интеграцияға экономикалық интеграция арқылы қолдау көрсетуі керектігін атап көрсетті. Осы бағытта, 2005 жылдың ақпан айында Қазақстан Президенті Нұрсұлтан Назарбаевтың Орталық Азия Одағын құру идеясын ұсынғанын тілге тиек етті.

Ортақ өркениеттің қалыптасуында бірыңғай мәдени құрылымның маңызды екенін және Орталық Азия елдерінің тілі, діні мен ортақ тарихының да оң ықпал ететінін де атап өтті. Алайда, аймақтағы елдердің тәуелсіздік алғаннан кейін өздеріне тән жеке ұлттық болмыстарына басымдылық беріп, бір-бірінен алыстай бастағанын да баса айтты. Бұл тақырыпқа тарихшылардың, жалпы алғанда ғалымдардың белсенді түрде аймақ елдерінің ортақ құндылықтарын көрсету үшін жұмыс істеулері және сол құндылықтарды халыққа түсіндіре білулері қажеттігін баяндады. Тарихи тұрғыдан қарастырғанда, аймақ елдері өзара тығыз ынтымақтасқан немесе одақтасқан кездерде өңірлік интеграцияның артқандығын және бірыңғай өркениеттің қалыптасуына оң әсер еткенін де сөз етті.

Еркін Байдаров Орталық Азия тарихы туралы ортақ оқулықтың жоқтығын айта келіп, аймақтағы әрбір ұлттың жеке тарихын ғана басты бағыт етуге талпынуы салдарынан туындаған бәсекелестік жағдайдың ортақ өркениет идеясына кері әсер еткенін атап көрсетті. Осы тұрғыдан аймақ елдерінің ортақ құндылықтарына басымдылық берілген жағдайда, аталмыш даулардың туындамайтынын білдірді. Семинар барысында жаһандану кезеңінде әлемде бірыңғай мәдениеттің жалпыласып келе жатқанын, бұл ағымға әр ел өзінің мәдени құндылықтары арқылы қарсы тұра алатынын баян етті. Еркін Байдаров өз сөзінде Самюэль Хантингтонның мәдениет теориясына сілтеме жасай отырып, мемлекеттердің үлкен мәдениеттер шеңберінде жеке мәдениеттерін қорғай алатын айта келе, Орталық Азия мемлекеттерінің Түркілік негізде бірлесіп өздерін қорғай алатынын мәлім етті. Орталық Азияда ортақ өркениет қалыптастыру үшін «ана немесе мына мемлекетке тиесілі» деген түсініктен гөрі, аймақтағы халықтардың ұқсас құндылықтарының ортақ құндылықтар ретінде қабылдануы қажет екенін атап көрсетті.

Семинар соңында қатысушылар Орталық Азиядағы аймақтық интеграция мәселелері жөнінде өзара пікір алмасты.