З.ғ.д. Фетхи Кылыч «Адам құқықтарының тарихи дамуы және олардың санаттары» атты семинарында адам құқықтары, адам құқықтарының санаттары және мемлекеттердің адам құқықтарына деген көзқарасы сияқты тақырыптарды қозғады. Адам құқықтары ұғымына толық сипаттама беріп шығып, оның адамға тумысынан берілетінін және абырой мен қадiр-қасиетке парапар екенін атап өтті. Ал құқық тәртібінде адам құқықтарының пайдаланылуы адамдардың өз еркіне беріліп, қоғамның мүдделерімен шектелген ұғымның адам құқықтары деп аталатынын айтты. Мемлекеттер бұл құқықтарды тану, қорғау және жүзеге асыру қажет деп түйіндеді.
Семинар жалғасында адам құқықтары жөніндегі теориялық пікірталастарға тоқталып өтіп, күштілер әрқашан қақылы ма деген сұрақты талқылау қажеттігін айтты. Адам құқықтарына жалпы стандарт орнату үшін Біріккен Ұлттар Ұйымының Адам құқықтарының жалпыға бірдей декларациясын әзірлегенін және оған Біріккен Ұлттар Ұйымына мүше елдердің қол қойғанын мәлімдеді. Адам құқықтары жөніндегі еуропалық конвенция, Адам құқықтары жөніндегі еуропалық сот және одан кейінгі келісімдердің жалпы адам құқықтары стандартын құру мақсатында жасалғанын мәлімдеді.
Адам құқықтарын сипатына қарай үш топқа жіктеуге болатынын айтты. Бірінші топқа адамдардың табиғи және айырғысыз құқықтары, екінші топқа экономикалық және әлеуметтік құқықтар, ал үшінші топқа өзін-өзі білдіру құқығы жатады деп айқындады. Ал бостандықтарға келгенде, бұл ұғымға дұрыс анықтама беру қажеттігін, себебі бостандық дегеніміз көңілге келген нәрсені істей беру еместігін, бостандық дегеніміз адамның заң шеңберінде, қоғамдық тәртіпті бұзбай еркін іс-әрекет етуге мүмкіншілігінің болуы екенін тілге тиек етті.
Мемлекеттердің адам құқықтарының танылуы мен жүзеге асырылуын жеңілдетуі қоғамның бірігуіне әкеледі, ал бұл шарттардың орындалмауы көптеген мәселелердің туындауына себепкер болуы мүмкін деп атап өтті. Адам құқықтары баршаға қажет болғандықтан жақсы жүйе орнату керектігін, адамдар құқық бұзушылыққа куә болған жағдайда оны жоюға барынша атсалысу қажеттігін айтты. Мемлекеттердің адам құқықтарына көзқарастарының әртүрлі болуы мүмкін екенін атап өтіп, батыс елдерінде саяси және азаматтық құқықтарға, социалистік елдерде экономикалық құқықтарға және үшінші әлем елдерінде ұлттық тәуелсіздікке қатысты құқықтарға баса мән берілетінін айтты. Біріккен Ұлттар Ұйымының бұл құқықтарды бір мәтін түріне келтіргенін және Адам құқықтарының жалпыға бірдей декларациясына қол қойған елдер бұл құқықтардың шарттарын орындауға міндетті екенін білдірді. Баяндама соңында адам құқықтарының адамның ұлтына, нәсіліне, жынысына, тіліне, дініне және мәртебесіне қарап өзгермейтінін айтып, болашақта адам құқықтары бұзылмайтын күнге жетейік деген тілек білдірді.
Семинар соңында қатысушылар адам құқықтарын қорғау мәселелері бойынша пікір алмасты.