«Қазақстан Республикасының Ұлттық қоры: мәселелері мен перспективалары» атты семинарында Данияр Нұрбаев жалпы Қазақстан Республикасы Ұлттық қорының тарихи дамуы, мақсаты, функциялары мен миссиясы туралы баяндады. Нұрбаев, сондай-ақ Қордың ағымдағы жағдайы мен ағымдағы сыртқы макроэкономикалық ауытқулардың әсеріне талдау жасады. 2000 жылы Қазақстан Республикасы Президенті Нұрсұлтан Назарбаевтың шешімімен құрылған Ұлттық қордың Қаржы министрлігіне тесілі екенін мәлімдеді. Алайда, Қордың Басқару кеңесі тарапынан бақыланып, Қазақстан Республикасы Ұлттық Банкі тарапынан басқарылатынын мәлімдеді. Сондай-ақ, Қазақстан Республикасының Ұлттық қорынан бөлінген қаражаттың жұмсалуын бақылау жөніндегі комиссия туралы мағлұмат берді. Баяндама барысында Нұрбаев Қазақстан Республикасы Ұлттық қорының норвегиялық үлгі (SWF) негізінде құрылғанын айтты.
Семинар жалғасында Данияр Нұрбаев Ұлттық қордың негізгі функцияларына тоқталып өтіп, қордың ел экономикасын тұрақтандыру, болашақ ұрпақ үшін қаржы жинақтау және «голланд ауруының» алдын алу сияқты негізгі функциялары туралы егжей-тегжейлі ақпаратпен бөлісті. Қордың қаржы жинақтау функциясының қаржылық активтер мен басқа да активтерді жинақтауды қамтамасыз ететінін, ал тұрақтандыру функциясының қор активтерінің өтімділігін жеткілікті деңгейде сақтап тұратынын мәлімдеді. Қордың активтерін бөлуде тұрақтандыру портфелінің үлесі 28%-ды, ал жинақтау портфелінің үлесі 72%-ды құрағанын ескерген кезде қордың негізгі мақсаты болашақ ұрпақтар үшін қаржы жинақтау екенін мәлімдеді. Жинақтау портфелін бөлуде инвестициялардың негізінен АҚШ, ЕО, Ұлыбритания, Жапония және Канада сияқты елдердің қазынашылық вексельдеріне жасалатынын атап өтті.
Сонымен қатар, Нұрбаев 2001-2016 жж. Ұлттық қорға жасалған инвестиция көлемінің 2001-2008 жж. артып, 2009 жылы жаһандық экономикалық дағдарыс салдарынан төмендегеннен кейін 2008 жылғы деңгейге тек 2010 жылы жете алғанын айтты. Бұл өсім 2010-2014 жж. жалғасып, 2010 жылы 29 млрд. доллардан 2014 жылдың соңында 76 млрд. долларға дейін артты, ал 2016 жылдың соңына қарай бұл көрсеткіш 61 млрд. долларға дейін төмендеді деп түйіндеді. Сондай-ақ, 2007-2016 жж. қаражатты пайдалану үдерісінің үздіксіз артып жатқанын мәлімдеді. Семинар соңында қордың болашағы мұнай бағасына байланысты екенін айтып, өз сөзін аяқтады.
Семинар соңында қатысушылар Қазақстан Республикасының Ұлттық қорының мәселелері мен перспективаларын талқылап, бұл мәселе бойынша пікір алмасты.