2022 жылдың 22 қыркүйегінде Қожа Ахмет Ясауи атындағы Халықаралық қазақ-түрік университетінің Еуразия ғылыми-зерттеу институты мен Гарвард университеті Фэйрбанк қытайтану орталығы бірлесіп «Шығыс пен Батыс деректеріндегі Қазақ хандығы шекарасының қалыптасуы» атты конференция өткізді.

Конференцияның ашылу сөзін сөйлеген институт директоры, доктор Суат Бейлур Қожа Ахмет Ясауи атындағы Халықаралық қазақ-түрік университетінің Еуразия ғылыми-зерттеу институты мен Гарвард университетінің Фэйрбанк қытайтану орталығы бірлесіп ұйымдастырған конференцияның тарихи карталар негізінде Қазақ хандығының  шекараларының таныстырылуын ашып көрсету арқылы картографиялық және аймақтық зерттеулерге, әсіресе қазақ тарих ғылымына маңызды үлес қосуды мақсат еткенін атап өтті.  Доктор Суат Бейлур сөз соңында конференция қонағы профессор, т.ғ.д. Нұрлан Кенжеахметтің ғылыми зерттеулеріне тоқталды.

Профессор, т.ғ.д. Нұрлан Кенжеахмет картографияның тарихи зерттеулердегі рөліне тоқталып, өзінің ғылыми зерттеулерінің негізінен картография саласына бағытталғанын жеткізді. Профессор Кенжеахмет XII ғасырдан бергі сан алуан дереккөздерден алған тарихи карталарды ретімен таныстыра отырып, жалпы Қазақ хандығының шекарасының қалай қалыптасқанынан бастап, көптеген елді мекендердің атауларына ерекше тоқталды. Профессор Кенжеахмет Шығыс және Батыс деректерінен алынған карталар арқылы бүгінгі Қазақстан аумағындағы жер-су атауларын салыстырмалы түрде түсіндірді. Сөзінің жалғасында аталмыш жер-су атаулары мен қазақтардың мекендеген географиясы әр картада әр түрлі белгіленетінін де тілге тиек еткен профессор Кенжеахмет қазақ жерінің тарихта Kosaky Orda, Kasaky Tartar, Kasaki Tartari және Independent Tartary сияқты әртүрлі атаулармен аталғанын жеткізді. Конференция соңында отандық және шетелдік қатысушылар сұрақтар сұрап, пікірлерімен бөлісті.