Еуразия ғылыми-зерттеу институтының директоры, доцент доктор Вакур Сүмердің кіріспе сөзінен кейін Рицумейкан университеті (Жапония) Халықаралық қатынастар институтының профессоры, доктор Цсомбор Ражкай, Мин династиясының (1368-1644) халықаралық қатынастарындағы идеологиясы мен прагматизмі туралы ақпарат берді. Профессор, доктор Цсомбор Ражкай ортағасырлық Қытай тарихында маңызды орын алатын Мин династиясының құрылуы мен дамуы туралы айта отырып, династияның алғашқы кезеңінде елдің саяси, әлеуметтік, экономикалық және әскери жағынан дамығанын мәлімдеді.
Ол ауыл шаруашылығы және мемлекеттік сектор, әсіресе ұзақ соғыстар аяқталғаннан кейін, жедел дамығанын, тұрақты армияның құрылғанын, биліктің орталықтандырылғанын атап өтіп, алғашқы екі император Чжу Юаньчжанг пен оның ұлы Чжу Дидің сәтті билігінен кейін уақыт өте келе мемлекет ыдырай бастағанын баса айтты. Императорлардың жақын серіктестері жерді толық жекешелендіргеннен кейін, мемлекеттік сектор іс жүзінде жойылғанын айта отырып, Мин династиясы өзін-өзі оқшаулау саясатын жүргізе бастағанда, Қытайдың солтүстік-шығысында Нурхачи әулетінің билігінде жас, бірақ қуатты манжур мемлекетінің пайда болғанын баяндады. Билеушілердің мәжбүрлеп салық жинауына қарсы шаруалар көтерілісі нәтижесінде Мин әулеті құлатылғаннан кейін елдің Цин империясының қол астына өткендігін айтты.
Семинардың жалғасында профессор, доктор Ражкай, Мин әулеті Қытайдың халықаралық қатынастар тарихында маңызды рөл атқарғанын айта отырып, Мин императоры Тайцзу (1368-1398) патшалық еткен кезден бастап моңғолдардың немесе Батыс түрік халықтарының қауіп-қатерінен қорғану үшін шетелдік география туралы ақпарат жинауға ерекше назар аударылатынын тілге тиек етті. Мин династиясының елшілерін немесе керуендерін Тибетке, Кореяға, Аннанға (Оңтүстік Қытай) және Орта Азияға жіберу арқылы осы аймақтардың карталары мен географиялық деректерін жинағанын айта отырып, Юань династиясы кезінде салынған карталар негізінде жаңа карталардың салынғанын мәлімдеді. Мин әулетінің жерлері батыста Цзяюйган қамалынан аса алмағандықтан, оның Орталық Азиядағы ықпалының шамалы болғанына тоқтала келіп, алайда Тимуридтер империясы мен Мин династиясы арасындағы қатынастарды зерттеу Орталық Азияның да, Қытайдың да сыртқы қатынастарының тарихымен танысқысы келетіндер үшін маңызды екендігін білдірді. Тимуридтер империясы мен Мин династиясы бұрынғы Шыңғысхан империясы ыдырағаннан кейін XIV ғасырдың екінші жартысында бір мезгілде пайда болғанын және екі династияның құрылуы Қытайдың сыртқы әлемге ашылғысы келген тарихи кезеңге сәйкес келгендігін баса айтып өз сөзін аяқтады.
Семинар соңында қатысушылар тақырып бойынша пікір алмаса отырып, сұрақ жауап бөлімімен аяқталды.