2022 жылы 24 қарашада Түркияның Шетелдегі түріктер және туысқан қауымдастықтар басқармасының (YTB) төрағасы Абдулла Ерен Қазақстанға сапары аясында Қожа Ахмет Ясауи атындағы Халықаралық қазақ-түрік университетінің Еуразия ғылыми-зерттеу институтында болды.

Институтымызға арнайы келген Шетелдегі түріктер және туысқан қауымдастықтар басқармасының делегациясы мен Түркия Республикасының Алматы қаласындағы Бас консулы Али Риза Акынжыға алғысын білдірген институт директоры, доктор Суат Бейлур жалпы институт пен институт қызметі, сондай-ақ атқарылып жатқан жұмыстар туралы баяндады. Шетелдегі түріктер және туысқан қауымдастықтар басқармасының төрағасы Абдулла Ерен өз сөзінде Еуразия ғылыми-зерттеу институты жүргізіп жатқан ғылыми зерттеулер мен академиялық жұмыстардың маңыздылығына назар аудара отырып, институттың тиісті әдебиеттерге маңызды үлес қосып отырғанын, сонымен қатар түркі мемлекеттері мен қауымдастықтары арасындағы ынтымақтастық үдерісіне белсенді атсалысқанын атап өтті. Сөзінің жалғасында Абдулла Ерен YTB-нің Түркия стипендиялары мен жобалар арқылы аймақта түрлі жұмыстар атқарып отырғанын айтып, Түркі мемлекеттері арасындағы ынтымақтастық үдерісінде шешуші рөл атқарып отырған Қазақстанның YTB үшін де барлық жақтан маңызды ел екенін атап көрсетті. Абдулла Ерен әлеуметтік және мәдениеттану ғылымының маңыздылығына тоқталып, YTB мен Еуразия ғылыми-зерттеу институтының осы тұрғыда бірлескен жұмыстар атқара алатынын жеткізді.