Әсет Ордабаев семинарында COVID-19 вирусы туралы қысқаша мағлұмат беріп, бұл індет бүкіл әлемдегі саяси жүйелер үшін үлкен сынақ болғанын мәлімдеді. Ол жаһандану жағдайында өте жоғары жылдамдықпен әрі қауіпті ауқымда таралып жатқан індетке қарсы күресте әлем елдерінің өздігінен әрекет етуді жөн көргендерін айтты. Әсет Ордабаев кейбір халықаралық ұйымдардың бүкіл әлем бойынша індетке қарсы тиімді күресе алмағандықтарына назар аударып, алдағы уақытта бұл ұйымдардың құрылымында түрлі өзгерістер болуы мүмкін деген пікір білдірді.
Семинар жалғасында Әсет Ордабаев ең алдымен COVID-19 індетіне қарсы медициналық күрес жүргізілетінін, содан кейін жаһандық деңгейде экономикалық дағдарыс болатынын, әсіресе, денсаулық сақтау жүйесінде маңызды өзгерістер болуы мүмкін екенін айтты. Бұл елдердің аймақтық және жаһандық ауқымдағы экономикалық және саяси интеграциялық саясаттарында да көрініс табатынын сөз етті. Әсет Ордабаев індет қарқынын төмендету мақсатында елдер арасындағы ынтымақтастықтардың тоқтатылғанын немесе қысқартылғанын атап өтті. Тура мағынада оқшаулану деңгейіне жеткізбей, ынтымақтастықтың белгілі бір деңгейін сақтап тұру маңызды екенін баса айтты.
Семинар соңында Әсет Ордабаев COVID-19 пандемиясы кезінде байқалғандай, дағдарыс аясында жаһандық ынтымақтастықтың орнына аймақтық және ұлттық деңгейдегі шаралар қабылданғанын және бұл үдеріс жаһандану идеологиясына да әсер етпей қоймағанын жеткізді. Алайда алдағы уақытта бұл індет бүкіл әлемде бақылауға алынса, жаһандану мен елдер арасындағы ынтымақтастық қайта жанданатынын білдірді. Ол осы індет салдарынан туындаған дағдарысты елдер мен халықаралық ұйымдар арасындағы ынтымақтастықты нығайтып, бірлесіп жұмыс жасау арқылы еңсеруге болатындығын айтты.