Доцент, доктор Вакур Сүмер семинарында Еуразия ғылыми-зерттеу институты тарапынан өткізілетін семинарлардың COVID-19 індеті салдарынан бұдан былай онлайн-семинарлар ретінде жалғасатынын атап өтті.
Доцент, доктор Вакур Сүмер 2020 жылдың басында Қытайда пайда болған COVID-19 індеті мұнай бағасының жаһандық деңгейде құлдырауының басты себептерінің бірі екенін айтып, Сауд Арабиясы мен Ресей арасындағы дау-дамайға байланысты мұнай бағасы соңғы 25 жылдағы ең төменгі деңгейіне түскенін мәлімдеді. Экономикасы мұнай мен газға тәуелді елдерге едәуір әсер еткен бұл індеттің экономикалық салдары Қазақстан үшін де ауыр болып, ұлттық валюта теңгенің шұғыл құлдырауына әкеп соқтырғанын сөз етті. Қазақстан экспортының 16 миллиардтан астам долларға азаюы күтілгенін атап өткен доцент, доктор Вакур Сүмер импорт көлемі де шамамен 7,5 миллиард долларға азаятынын тілге тиек етті.
Семинар жалғасында доцент, доктор Вакур Сүмер Қазақстанның COVID-19 індетіне қарсы күрес шаралары туралы баяндап, республика бойынша статистикалық ақпараттармен бөлісті. Доцент, доктор Вакур Сүмер пандемияның салдарына қарсы күрес шаралары аясында Қазақстанның көптеген салаларында салықтық жеңілдіктер мен қолайлы пайыздық несие мүмкіндіктері ұсынылғанын айтып, осы салалардағы салықтық жүктемені азайту және несиені өтеуге жеңілдіктер беру туралы толық ақпарат берді. Сүмер Қазақстанда мұндай дағдарыс жағдайларында пайдалануға болатын жеткілікті деңгейдегі ресми жинақ қаражаты бар екендігін мәлімдеді. Сүмер сондай-ақ, пандемияның салдарынан сауда қатынастары да айтарлықтай зардап шеккенін айтты. Жаһандық індет Орталық Азия елдерінің негізгі сауда серіктестері болып табылатын Қытай мен Ресейдің экономикаларына кері әсерін тигізгенін айта келе, мұның Орталық Азия елдерінде де көрініс табатынын айтты.
Семинар соңында доцент, доктор Вакур Сүмер осы тақырыпты зерттейтін сарапшылардың пікіріне сүйене отырып, ағымдағы дағдарыс 2008 жылғы дүниежүзілік қаржы дағдарысынан гөрі әлдеқайда қиын болатынын және Орталық Азия елдеріне әртүрлі дәрежеде әсер ететінін мәлімдеді.