Қожа Ахмет Ясауи атындағы Халықаралық қазақ-түрік университетінің құрамындағы «Еуразия» ғылыми-зерттеу институты құрылған күннен бастап, негізінен Орталық Азия аймағында Еуразиялық кеңістікті қамтитын түрлі тақырыптарда академиялық зерттеулер жүргізіп, іс-шаралар ұйымдастырып келеді. Білімді стратегияға айналдыру мақсатында біздің институт түрік, қазақ, ағылшын және орыс тілдерінде басылымдарды жарыққа шығару арқылы аймақтық зерттеулер бойынша әдебиет пен тарихнамаға қосып жатқан үлесі жыл сайын артуда. Аз уақыт ішінде өз қызметімен таныла білген біздің институттың жетістіктері халықаралық аренада да мойындалып жатыр.
2021 жылы 28 қаңтарда жарияланған Global Think Tank Index-іне өткен жылы алғаш рет 3075 сараптама орталықтары қатысып, индекс тізіміне енетін үміткер ұйымдардың жалпы саны 11.175-ке дейін жетуі көптеген көрсеткіштер бойынша бәсекелестіктің артып келе жатқанын білдіреді. Көптеген санаттар бойынша біршама өзгерістер орын алғанына қарамастан, «Еуразия» ғылыми-зерттеу институты бүкіл әлем бойынша өзге санаулы ұйымдармен бірге «Сыртқы саясат пен халықаралық қатынастар бойынша үздік сараптама орталықтары» санатына кіре алды.
COVID-19 індетіне байланысты іс-шаралардың айтарлықтай бөлігі интернет желісіне ауыса бастағандықтан, біз де Еуразия ғылыми-зерттеу институтымыздың қызметін цифрлық ортаға нәтижелі түрде көшірдік (мысалы, Zoom және ұқсас платформалар). Осының арқасында, біз 2020 жылы бүкіл әлемде «Интернетті ұтымды пайдаланатын ақыл-ой орталықтарының» қатарынан табыла білдік.
Бұл санаттарға біз Еуразия ғылыми-зерттеу институты ретінде кіріп, «Сыртқы саясат пен халықаралық қатынастар бойынша үздік сараптама орталықтары» тізімінде Қазақстанның екі институтының бірі, ал «Интернетті ұтымды пайдаланатын ақыл-ой орталықтары» санатында Қазақстанның жалғыз институты ретінде танылу біз үшін үлкен жетістік пен мақтаныш.
Бұл көрсеткіштер, Еуразия ғылыми-зерттеу институты бұрынғысынша халықаралық академиялық қауымдастықта өз орны бар ғылыми мекеме екенін білдіреді. Орталық Азия аймағындағы өзекті және маңызды мәселелерді зерделеуге назар аудара отырып, өз жарияланымдарымызды бірнеше тілде жарыққа шығару арқылы біз өз оқырмандарымызды бұл жаһандық кеңістікке тартуға күш салып келеміз.
Орталық Азия аймағында жұмыс істейтін зерттеушілерге және оны зерделеумен айналысатын мамандарға өзекті әрі құнды ақпарат беру қызметіміз осындай индекстермен бағаланып, институтымыздың танымалдылығы артып жатқанына қуаныштымыз. Болашақта да біздің институт университетіміздің мақсаты мен миссиясына сәйкес өзінің академиялық қызметін одан ары жалғастырып, әлемде танылып мойындалған сараптама орталығына айналуға талпынады.