Институт директоры, доктор Суат Бейлур өзінің кіріспе сөзінде Көші-қонды зерттеу қорының қызмет салалары мен доктор Мехмет Көсенің қызығушылық танытатын салаларын айта отырып, көші-қон құбылысының жаһандық саясаттағы маңызының артып келе жатқанын тілге тиек етті. Семинарында доктор Мехмет Көсе диаспораның даму барысы туралы қысқаша мәлімет бергеннен кейін алдымен этникалық, ұлт, ұлттық және бірегейлік сынды миграция және диаспора ұғымдарына түсініктеме берді. Бүгінде ондаған миллион адамның туған жерінен тыс жерде тұрып жатқанын айта отырып, олардың барлығы болмаса да, айтарлықтай бөлігін диаспора және диаспоралық саясат тұжырымдамасы аясында қарастыру мүмкін екенін айтқан доктор Мехмет Көсе диаспоралардың қазір мемлекеттердің қызығушылығын тудыратын тақырып екенін атап өтті.
Доктор Мехмет Көсе мемлекеттердің қазіргі диаспораларға қатысты әртүрлі саясат жүргізіп жатқанын, бұл бағытта Түркияның тамыры терең диаспора саясаты бар екенін, XX ғасырдың ортасындағы Еуропаға еңбек миграциясының да, Османлы кезінен Балқан мен Таяу Шығыста қоныстанып қалған қауымдастықтардың да орны ерекше маңызды екенін тілге тиек етті.
Алайда түрік диаспорасы мезгіл-мезгіл әртүрлі сипаттарды көрсеткенін баяндаған доктор Мехмет Көсе Орталық Азиядағы диаспора құбылысына тоқталып, жер аудару мен соғыс салдарынан аймаққа айтарлықтай көші-қон ағыны келгенін, бүгінде аймақтың миллиондаған халқы туған жерінен тыс жерде тұратынын, екінші жағынан Қырғызстан, Тәжікстан және Өзбекстан сияқты аймақ елдерінен 5 миллионнан астам адамның, әсіресе 2000 жылдардан кейінгі кезеңде экономикалық себептермен Ресейге қоныс аударғанын жеткізді. Доктор Мехмет Көсе бүгінгі күні өз отанынан тыс жерде тұратын түрік диаспорасының қандай да бір себептермен сан жағынан да, экономикалық жақтан да айтарлықтай қарқын алғанын білдіріп, аймақ мемлекеттерінің диаспораға қатысты әзірлейтін саясаттарында Түркия тәжірибесінің маңыздылығына тоқталды.
Семинар соңында қатысушылар баяндама тақырыбы бойынша өзара пікір алмасқан соң институт директоры, доктор Суат Бейлур баяндамасы үшін доктор Мехмет Көсеге алғысын білдірді.