«Абайтану: отандық және шетелдік зерттеулер» тақырыбындағы ғылыми талқыға абайтанушы ғалымдар мен Еуразия ғылыми-зерттеу институтының барлық зерттеушілері қатысты.
Ғылыми талқыда кіріспе сөз сөйлеп, сонымен бірге модератор болған Еуразия ғылыми-зерттеу институтының директоры доцент, доктор Вакур Сүмер Абай Құнанбайұлының Қазақ жазба әдебиетінің негізін салушы және ұлы тұлғалардың бірі екенін айтты. Қожа Ахмет Ясауи университетіне қарасты Еуразия ғылыми-зерттеу институты ретінде Абай Құнанбайұлының 175 жылдық мерейтойына орай көптеген шаралар ұйымдастыруға шешім қабылдағанын мәлімдеді. Доцент, доктор Вакур Сүмер бұл іс-шаралар негізінен жобалар түрінде жүзеге асырылатынын түсіндіріп, Еуразия ғылыми-зерттеу институты Абайды тереңірек зерттеп, тану саласында жас ғалымдарға қолдау көрсететінін білдірді.
А. Байтұрсынұлы атындағы Тіл білімі институтының директоры, ф.ғ.д., профессор Ерден Қажыбек баяндамасын ғылыми талқыны ұйымдастырған Еуразия ғылыми-зерттеу институтына алғыс білдіруден бастады. Абай тақырыбы бүкіл Түркі әлемі үшін үлкен маңызға ие екенін айтқан ф.ғ.д., профессор Ерден Қажыбек Қожа Ахмет Ясауи және Абай сияқты бүкіл әлемге әсер етіп, пайдасын тигізген тұлғаларды міндетті түрде білуіміз қажеттігін атап өтті. Сондай-ақ, бүкіл әлем Абайды Мұхтар Әуезовтың арқасында танығанын және «Абай жолы» романы бүгінде көптеген тілдерге аударылғанын айтты.
Еуразия ғылыми-зерттеу институты директорының орынбасары доктор Суат Бейлур баяндамасында Абайдың шығыс пен батыстың синтезі болып табылатынын айтты. Абай Құнанбайұлы қазақ-түрік ортақ мәдениетінің қазіргі Қазақстандағы көрінісі екенін атап өткен Бейлур екі айдан бері Абай Құнанбайұлы туралы зерттеулерді қарастырып келе жатқанын тілге тиек етті. Бұл жұмыстардың нәтижесінде ғылыми сипаттағы ауқымды библиографиялық көрсеткіш жарыққа шығатынын жеткізді. Доктор Суат Бейлур бұл тақырыпта әлі мұндай сапа мен ауқымда зерттеу жасалмағанын айта кетіп, Нұр-Сұлтан және Семей сияқты маңызды қалалардан шамамен 7-8 адамнан тұратын топпен бірге ортақ жұмыстар жүзеге асырылатынын хабарлады.
әл-Фараби атындағы Қазақ Ұлттық университеті жанындағы Абай ғылыми-зерттеу институтының аға ғылыми қызметкері ф.ғ.к, доцент Ләйлә Мұсалы баяндамасында Абай есімі қазіргі уақытта қазақ сөзінің синониміне айналғанын айтты. Ф.ғ.к, доцент Ләйлә Мұсалы әл-Фараби атындағы Қазақ ұлттық университетінде «Абайтану» дәрісі оқытылатынын айта отырып, қазақ жастарының Абайға деген қызығушылығы күннен-күнге артып келе жатқанын тілге тиек етті. Сөз соңында ф.ғ.к, доцент Ләйлә Мұсалы Абай ғылыми-зерттеу институты шығарған кітаптарды Еуразия ғылыми-зерттеу институтының кітапханасына сыйға тартты.
Шәкәрім атындағы Семей мемлекеттік университетінің қазақ әдебиеті кафедрасының меңгерушісі доцент, доктор Арай Жүндібаева баяндамасында Абай Құнанбайұлының шежіресін егжей-тегжейлі таныстырды. Абайды терең зерттеу оңай емес екенін айта келе, бұл тақырыпты зерттеу кезінде кездескен кемшіліктер мен мәселелерге тоқталды.
Ғылыми талқының соңғы бөлігінде Еуразия ғылыми-зерттеу институтының қызметкерлері тақырып бойынша өз ойларымен бөлісті. Іс-шара сертификат табыстаумен аяқталды.