Ашылу салатанатында Қожа Ахмет Ясауи атындағы Халықаралық қазақ-түрік университеті Еуразия ғылыми-зерттеу институтының директоры, доктор Суат Бейлур, Қожа Ахмет Ясауи атындағы Халықаралық қазақ-түрік университетінің Өкілетті кеңес төрағасы, профессор, доктор Мұхиттин Шімшек, Қожа Ахмет Ясауи атындағы Халықаралық қазақ-түрік университетінің ректоры, доктор Жанар Темірбекова, Түркия Республикасының Алматы қаласындағы Бас консулы Али Рыза Акынжы, Әзірбайжан Республикасының Алматы қаласындағы консулы Анар Хусейнзаде, М.О. Әуезов атындағы Әдебиет және өнер институтының директоры, профессор, ф.ғ.д., Кенжехан Матыжанов, «Абай академиясы» ғылыми-зерттеу институтының директоры Жандос Әубәкір және Абай атындағы Қазақ ұлттық педагогикалық университетінің «Хакім Абай» ғылыми-зерттеу орталығының директоры, профессор, доктор Жабал Шойынбет сөз сөйледі.
Өкілетті кеңес төрағасы, профессор, доктор Мұхиттин Шімшек өз сөзінде Абай Құнанбайұлы Қазақстан үшін ғана емес, күллі түркі әлемі үшін маңызды құндылық екенін айтып, Қожа Ахмет Ясауи атындағы Халықаралық қазақ-түрік университетінің осындай бастамамен Абайды Қазақстан мен Түркиядан тысқары елдерде танып, біліп, оқуы үшін аталған сирек туындыларды дайындауға үлкен мән беретінін жеткізді. Бұл еңбектердің туыстас әдебиетке қосқан үлесін атап өткен профессор, доктор Мұхиттин Шімшек ұсынылып отырған еңбектерге үлес қосқан зерттеушілерге әсіресе институт қызметкерлеріне алғысын білдірді.
Ашылу сөзінен кейін Абай атындағы Қазақ ұлттық педагогикалық университетінің профессоры, ф.ғ.д. Исламия Халитова, Құрманғазы атындағы Қазақ ұлттық консерваториясының оқытушысы доцент, ө.ғ.к. Әлия Сабирова, М.О. Әуезов атындағы Әдебиет және өнер институты директорының орынбасары доцент, ф.ғ.к. Төреәлі Қыдыр, М.О. Әуезов атындағы Әдебиет және өнер институтының бас ғылыми қызметкері, профессор, ф.ғ.к. Серікқазы Қорабай мен Қожа Ахмет Ясауи атындағы Халықаралық қазақ-түрік университеті Еуразия ғылыми-зерттеу институтының аға ғылыми қызметкері Алмас Жүнісбаев дайындалған еңбектердің жұмыс барысын толық түсіндіріп өтті. Қазіргі Абайтану зерттеулерінің бірқатар маңызды мәселелеріне қатысты пікірлерін ортаға салған баяндамашылар ұсынылып отырған қос еңбектің ғылыми жаңалықтарға толы екендігін, абайтану ғылымының одан әрі дамуына тың серпін беретінін жеткізді.
Өз сөзінде «The Wisdom of the Great Steppe – Abai Kunanbaiuly» кітабы Абай өмірі мен шығармашылығын әр қырынан танытуды көздейтін ұжымдық монография екенін атап өткен доктор Суат Бейлур, «Абай Құнанбайұлының өмірі мен әулеті», «Абай Құнанбайұлының өскен ортасы мен заманы және оған әсер еткен тұлғалар», «Абай және 20 ғасырдағы рухани қозғалыстар», «Хакім Абай», «Абайдың қайраткерлігі», «Абайдың әдеби мектебі», «Абай шығармаларының қолжазбаларын салыстыру», «Абай шығармаларына тілдік талдау», «Абай шығармаларын шет тілдерге аудару мәселелері», «Абай шығармаларындағы сатира», «Абай шығармаларындағы әйел-ана», «Абай және музыка», «Абай көзқарастарының діни негіздері», «Абайдың тарихи көзқарастары», «Абайдың педагогикалық көзқарастары», «Абай шығармаларына кеңестік тоталитарлық жүйенің қарсылығы», «Абай жолы» романындағы кеңестік идеологияның іздері» және «Абай философиясының Қазақстанның сыртқы саясатындағы көріністері» қатарлы тақырыптар негізінде дайындалғанын тілге тиек етті.
«Абай Құнанбайұлы: сипаттамалы библиографиялық көрсеткіш» атты екі томдық еңбек туралы толық мәлімет берген Алмас Жүнісбаев аталмыш көрсеткіш Абай шығармалары, монография, оқулық, оқу-әдістемелік құрал, библиографиялық көрсеткіш, диссертация (докторлық, кандидаттық және PhD), газет-журнал мақалалары мен Абайтану саласындағы басқа да басылымдарды қосқанда 12 мыңнан астам деректі қамтығанын атап көрсетті. Осы тұрғыда Алмас Жүнісбаев библиографияның І томында 1909-2020 жылдар аралығында елімізде, сондай-ақ шетелдерде қазақ және шет тілдерінде басылған жалпы 1069 дана Абай шығармалар және абайтану еңбектерінің сипаттамасы жазылғанын, ал библиографияның ІІ томында «Абай жолы» романының барлық басылымдары, Абай туралы кітап тараулары, отандық және шетелдік газет-журнал мақалалары, ғылыми конференциялар мен симпозиум баяндамаларын қамтыған жалпы 10600-ден астам басылым индекстелгенін жеткізді. Сонымен бірге аталмыш ерекшеліктерін ескере отырып, аталған еңбектің өз саласындағы алғашқы сипаттамалы және ең толық библиография екенін атап көрсетті.
Тұсаукесерден кейін барлық қатысушыларға аталған екі кітап пен институттың басылымдары сыйға берілді.